BMT-nin Məskunlaşma Proqramının Braziliya üzrə rəhbəri Rayne Ferretti Bakıda keçirilən Ümumdünya Şəhərsalma Forumunda (WUF13) çıxış edib.
O bildirib ki, su təminatı şəhərsalmanın əsas sütunlarından biridir və bu resursa sonsuz mənbə kimi yanaşmaq düzgün deyil.
“Dayanıqlı şəhərlərdən daha çox dayanıqlı vətəndaşlara ehtiyacımız var”, – deyə Ferretti vurğulayıb.
Braziliyada və Latın Amerikasında şəhərlər uzun illər su ehtiyatları nəzərə alınmadan inkişaf edib. Nəticədə bu gün baş verən iri təbii fəlakətlərin çoxu su ilə bağlıdır.
Keçmişdə çayların üstü örtülərək şəhər mühitindən təcrid olunub, hazırda isə dünyada çayların yenidən şəhər həyatına inteqrasiyası tendensiyası güclənir.
UN-Habitat rəsmisi qeyd edib ki, şəhərlərin təbiət prinsiplərinə uyğun planlaşdırılması, yaşıllıq sahələrinin artırılması, suyun səmərəli idarə olunması gələcəyin əsas istiqamətlərindəndir.
