Bakıda keçirilən Ümumdünya Şəhərsalma Forumunun (WUF13) uğurla başa çatması Azərbaycanın beynəlxalq nüfuzunu bir daha təsdiqlədi. Bu fikirləri Milli Məclisin deputatı Ceyhun Məmmədov Oxu.Az-a açıqlamasında bildirib.
Deputat qeyd edib ki, WUF13 iştirakçı sayı və miqyası baxımından forum tarixinin ən böyük sessiyası olub: "13-cü sessiya 176 ölkədən 57 mindən çox iştirakçını bir araya gətirərək rekord vurdu. COP29-dan sonra Azərbaycanda keçirilən ikinci ən böyük beynəlxalq tədbir olan WUF13 ölkəmizin qlobal problemlərin həllində etibarlı tərəfdaş rolunu göstərdi."
Forum çərçivəsində ilk dəfə keçirilən Liderlərin Sammiti xüsusi əhəmiyyət daşıyıb. Prezident İlham Əliyevin təşəbbüsü ilə təşkil olunan sammitdə 27 dövlət və hökumət başçısı iştirak edib. Çıxışlarda Azərbaycanın qonaqpərvərliyi və forumun yüksək səviyyədə təşkili vurğulanıb.
Nazirlər Görüşündə 70-ə yaxın ölkənin nazirləri iştirak edib. Qəbul olunan "Sədrin xülasəsi" sənədində Prezident İlham Əliyevin liderliyi və WUF13-ün forum tarixinin ən böyük sessiyası olduğu qeyd olunub.
Deputat bildirib ki, Azərbaycanın postmünaqişə dövründə həyata keçirdiyi bərpa-quruculuq işləri forum iştirakçıları tərəfindən maraqla qarşılanıb. "Böyük Qayıdış" proqramı və "ağıllı şəhər" konsepsiyaları beynəlxalq səviyyədə yüksək qiymətləndirilib.
WUF13 həm də konkret təşəbbüslər yaradıb. Bakı Şəhər Mükafatının təsis edilməsi və Dövlət Şəhərsalma Komitəsi ilə UN-Habitat arasında Niyyət Məktubunun imzalanması bunun nümunəsidir. Bu, Azərbaycanın qlobal miqyasda yeni təşəbbüslər irəli sürən ölkə olduğunu göstərir.
