Dövlət İmtahan Mərkəzi (DİM) mayın 17-də ümumi orta təhsil səviyyəsi üzrə növbəti imtahanları keçirəcək.
DİM-in açıqlamasına görə, həmin gün altı kateqoriya üzrə imtahan planlaşdırılıb. Bunlara əvvəlki illərin məzunları üçün qəbul imtahanı, cari ilin məzunları üçün əlavə xarici dil və tədris dili imtahanları, müxtəlif səbəblərdən aprel imtahanlarında iştirak edə bilməyən IX sinif şagirdləri üçün buraxılış imtahanı, eksternat qaydasında attestasiya və keçən ilki məzunlar üçün buraxılış imtahanı daxildir.
İmtahan iştirakçıları "İmtahana buraxılış vərəqəsi"ni DİM-in saytından çap edib götürə bilər. İmtahanlar saat 10:00-da başlayır, buraxılış rejimi isə 09:45-də başa çatır.
Buraxılış vərəqəsində göstərilən vaxtda imtahan binasına gəlmək tövsiyə olunur. İştirakçılar özləri ilə buraxılış vərəqəsi, şəxsiyyət vəsiqəsi (16 yaşadək şəxslər də daxil olmaqla) və zəruri hallarda fotoşəkilli arayış gətirməlidir.
Ümumilikdə imtahanlarda 7014 nəfərin iştirakı gözlənilir. Onlardan 42-si sağlamlıq imkanları məhdud şagirddir. Həmin şagirdlər üçün xüsusi zallar ayrılıb.
İmtahanlar 13 şəhər və rayonda təşkil olunacaq.
