23 iyun tarixində Baş Prokurorluqda dövlət qulluqçularının peşə bayramı münasibətilə tədbir keçirilib. Tədbirdə qurum rəhbərliyi, prokurorluq əməkdaşları və veteranlar iştirak edib.
Baş prokurorun birinci müavini Elçin Məmmədov çıxışında iştirakçıları təbrik edərək, Birləşmiş Millətlər Təşkilatının 23 iyun tarixini Dövlət Qulluğu Günü elan etdiyini xatırladıb. O, həmçinin Prezident İlham Əliyevin 2006-cı il sərəncamı ilə bu günün ölkəmizdə də peşə bayramı kimi qeyd olunduğunu bildirib.
Elçin Məmmədov dövlət qulluğunun inkişafında ümummilli lider Heydər Əliyevin xidmətlərini vurğulayaraq, Prezident İlham Əliyevin islahatlarının şəffaflıq, peşəkarlıq və vətəndaş məmnunluğunu artırdığını qeyd edib.
Baş prokurorun müavini Heydər Məmmədov çıxışında prokurorluq əməkdaşlarının cinayətkarlığa qarşı mübarizə, insan hüquqlarının qorunması və sənəd dövriyyəsi sahəsində töhfələrindən danışıb.
Ölkədə 27 min dövlət qulluqçusunun 31.4 faizini qadınlar təşkil edir. Prokurorluqda isə 624 nəfər çalışır, onların 39.4 faizi qadınlardır. Tədbirdə dövlət qulluqçuları Prezidentə və Birinci vitse-prezidentə minnətdarlıqlarını bildiriblər.
