Fövqəladə Hallar Nazirliyi (FHN) yaxın günlərdə gözlənilən güclü külək və qeyri-sabit hava şəraiti ilə əlaqədar əhaliyə müraciət edib.
Milli Hidrometeorologiya Xidmətinin məlumatına görə, bir sıra ərazilərdə arabir güclü külək əsəcəyi, intensiv yağış yağacağı, dağ çaylarından sel keçəcəyi və şimşək çaxacağı proqnozlaşdırılır.
FHN təhlükəsizlik qaydalarını xatırladır: güclü külək zamanı yüngül tikililərdən, reklam lövhələrindən, elektrik dirəklərindən və hündür ağaclardan uzaq durun. Küləkli havada yanğın təhlükəsizliyinə ciddi riayət edin. Kiçik gəmi istifadəçiləri dənizə çıxmasın.
İntensiv yağışlar sel və daşqın təhlükəsi yaradır. Təhlükəli ərazilərdən uzaq durun, selə yaxalansanız dərhal yüksək yerə qalxın.
İldırımdan qorunmaq üçün elektrik cihazlarını ayırın, telefonla danışmayın, açıq havada çökək yer seçin, avtomobildə qalın və şüşələri qaldırın.
