Gəncə şəhərində sahibsiz itlər 15 yaşlı məktəbliyə hücum edərək xəsarət yetirib. Hadisə Dədə Qorqud küçəsi 34B ünvanında baş verib.
Yeniyetmənin ailəsi Oxu.Az-a bildirib ki, övladları məktəbdən evə qayıdarkən saat 13:00 radələrində itlərin hücumuna məruz qalıb. Ailə tibbi yardım üçün xəstəxanaya müraciət edib.
“Oğlum yaşına görə özünü qismən müdafiə edə bilib. Kiçik olsaydı, itlər onu parçalayacaqdı. Küçədə itlər sürü ilə gəzir, təhlükə yaradır, amma tədbir görülmür”, – deyə ailə şikayətlənib.
Gəncə Şəhər İcra Hakimiyyətindən bildirilib ki, sahibsiz itlərin sayının tənzimlənməsi üçün mütəmadi tədbirlər görülür. Hər il iki dəfə baytarlıq aksiyası keçirilir, 200-dən çox it qısırlaşdırılır. 350-yə yaxın it isə Qaradağ sığınacağına yerləşdirilib.
