Bu günün gəncləri inkişaf siyasətinin sadəcə faydalanan tərəfi deyil, daha dinc, firavan və dayanıqlı regionun qurulmasında fəal tərəfdaşlardır.
Oxu.Az xəbər verir ki, bu fikirləri Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Baş katibi Kayrat Sarıbay Gənclər Şurasının 9-cu iclasında deyib.
O bildirib ki, innovativ yanaşmalar və vətəndaş fəallığı cəmiyyətlərimizin üzləşdiyi mürəkkəb çağırışların aradan qaldırılması üçün əvəzsiz əhəmiyyət daşıyır.
Gənclər Şurasının builki iclasının mövzusu olan "Dayanıqlı şəhər inkişafının təşviqində gənclərin iştirakı" olduqca aktualdır. Urbanizasiya cəmiyyətlərimizi sürətlə dəyişdirir. Şəhərlər iqtisadi inkişafın, innovasiyanın və mədəni mübadilənin mərkəzinə çevrilir, eyni zamanda ekoloji dayanıqlılıq, sosial inklüzivlik və ictimai sağlamlıqla bağlı ciddi çağırışlarla üzləşir. Rəqəmsal dövrün nümayəndələri olan gənclər bu problemlərin həlli üçün innovativ yanaşmalar irəli sürə bilər.
Baş katib vurğulayıb ki, görüşün Bakı Ağ şəhərində keçirilməsi xüsusi rəmzi məna daşıyır: "Bütün iştirakçıları Gənclər Şurasının bu iclasından region ölkələrinin gənc liderləri arasında dialoqu inkişaf etdirmək, təcrübələri və uğurlu nümunələri bölüşmək üçün platforma kimi istifadə etməyə çağırıram".
