Azərbaycanda gömrükdən keçən qida məhsulları ilə bağlı önəmli dəyişikliklər planlaşdırılır. Bu dəfəki yenilik xüsusilə yeyinti məhsulları, yemlər və qida ilə təmasda olan materialları əhatə edir.
Oxu.Az-ın məlumatına görə, sözügedən təklif Gömrük Məcəlləsinə ediləcək dəyişiklik layihəsində öz əksini tapıb. Mövcud qanuna əsasən, malların gömrük buraxılışı bəyannaməçi və ya nümayəndə tərəfindən müəyyən şərtlər yerinə yetirildikdən, qadağa və məhdudiyyətlər olmadığı təsdiqləndikdən sonra dərhal həyata keçirilir.
Yeni layihəyə görə, qida məhsulları, yemlər, həmçinin qida ilə təmasda olan materiallar artıq qida təhlükəsizliyi sahəsində dövlət nəzarətindən keçməli olacaq. Bu tədbirlər "Qida təhlükəsizliyi haqqında" qanuna uyğun həyata keçiriləcək.
Dəyişikliklərin məqsədi gömrükdən keçən məhsulların təhlükəsizliyini artırmaq və istehlakçıları qorumaqdır. Yeni qaydaların nə vaxt qüvvəyə minəcəyi hələlik açıqlanmayıb.
