Qəbələnin Laza kəndinə son iki gündə yağan leysan yağışları yol infrastrukturuna ciddi ziyan vurub.
Dəmiraparan çayından keçən güclü sel nəticəsində yolun bir hissəsi tamamilə yararsız hala düşüb. Təhlükəsizlik tədbirləri çərçivəsində kəndə əsas giriş bağlanıb.
Qəbələ Su Meliorasiya Sistemlərinin İstismarı İdarəsindən bildirilib ki, qurum əməkdaşları əraziyə baxış keçirib. Problemin qısa zamanda həlli üçün tədbirlər görülür.
Rayon İcra Hakimiyyəti yanında Fövqəladə Hallar Komissiyası bildirib ki, Laza kəndinə alternativ yoldan istifadə olunur. Çay yatağında nizamlama işləri aparılır, dağılan yolun bərpası üçün ağır texnika cəlb olunub.
