Gürcüstanın Bolnisi bələdiyyəsinin Dəmirli kəndində dəhşətli bir hadisə baş verib. 42 yaşlı Svetlana Əhmədova 7 yaşlı oğlu Fərrux Əhmədovu qayçı ilə qətlə yetirib.
Hadisə mayın 31-də baş verib. Ana psixi problemlərindən əziyyət çəkirdi. Kiçik Fərrux anasının intihara hazırlaşdığını görüb, onu xilas etmək üçün nənəsinə xəbər vermək istəyib. Lakin Svetlana qayçı ilə oğlunun ürəyinə zərbə endirib.
Hadisə zamanı evdə ailənin digər üç övladı da olub. Fərrux qan itkisindən hadisə yerində həyatını itirib. Ana isə özünə də xəsarətlər yetirsə də, həkimlər onun həyatını xilas edib.
Kənd sakinləri ailədə heç bir münaqişə olmadığını bildiriblər. Qadın polis tərəfindən saxlanılıb.
