Builki həcc ziyarətinə zəvvarlar ümumilikdə 7 təyyarə ilə yola düşəcəklər.
Oxu.Az xəbər verir ki, bu barədə Qafqaz Müsəlmanları İdarəsi (QMİ) Xarici əlaqələr şöbəsinin müdiri, həcc elektron sistem rəhbəri Vüsal Cahangiri danışıb.
Vüsal Cahangirinin sözlərinə görə, hər gün səhər saat 06:50-də və axşam saat 17:50-də olmaqla iki təyyarənin Bakı-Ciddə marşrutu üzrə zəvvar daşıması planlaşdırılır:
"Hər bir təyyarədə 180 zəvvar, yəni 45 nəfərdən ibarət dörd qrup olacaq. İlk təyyarə mayın 17-də səhər saat 06:50-də yola düşəcək, mayın 18-də və 19-da iki təyyarə uçacaq. Sonuncu 7-ci təyyarə isə mayın 21-də səhər Ciddəyə uçacaq. Həmin təyyarə ilə ziyarətə gedənlər mayın 31-də Ciddədən Bakıya geri qayıdacaqlar. Digər qruplar isə iyunun 6-da, 7-də və 9-da günə iki təyyarə olmaqla Mədinədən Vətənə dönəcəklər.
Beləliklə, sonuncu zəvvarımızın iyunun 10-da gecəyarısından sonra evə çatması gözlənilir".
Xatırladaq ki, 2026-cı il Həcc mövsümündə bir nəfər üçün ziyarət paketinin qiyməti 6 100 ABŞ dolları təşkil edib.
