Su obyektlərindən xüsusi məqsədlər üçün istifadəyə görə ödənişlərlə bağlı vətəndaşların suallarına ADSEA aydınlıq gətirib.
Xidmətdən bildirilib ki, ödəniş yalnız sahibkarlıq fəaliyyəti ilə bağlı su götürülməsi, tullantı sularının axıdılması və ya su akvatoriyasından istifadə üçün tələb olunur.
Vətəndaşlar şəxsi ehtiyacları üçün çimərlikdən istifadə, qayıqla gəzinti, idman, həvəskar balıq ovu və mal-qaranın suvarılması kimi hallarda ödənişsiz istifadə edə bilərlər.
Mərkəzləşdirilmiş su təchizatı olmayan ərazilərdə torpaq sahibləri birinci sulu horizontdan quyu qazaraq istifadə edə bilər, bunun üçün icazə və ödəniş tələb olunmur.
Ödənişlər 2026-cı il sentyabrın 1-dən tətbiq ediləcək. Sənaye məqsədilə Xəzərdən 100 kubmetr suya 0.4 manat, çay və göllərdən 4 manat, yeraltı sulardan 40 manat ödəniləcək.
