Bakının Hövsan qəsəbəsində təxminən beş il əvvəl təmirinə başlanılan Hövsan Mədəniyyət Sarayı hələ də istifadəyə verilməyib.
Hazırda acınacaqlı vəziyyətdə olan bina ilə bağlı bir qrup qəsəbə sakini sosial şəbəkələrdə videomüraciət yayaraq aidiyyəti qurumlara səsləniblər.
Sakinlər bildirirlər ki, vaxtilə müəyyən təmir işləri aparılsa da, prosesin dayanması binanın xarabalığa çevrilməsinə yol açıb.
Qəsəbə sakinlərindən birinin sözlərinə görə, üç il əvvəl binada daxili suvaq işləri görülmüş və pəncərələr quraşdırılmışdı. Lakin nəzarətsizlik və işlərin yarımçıq qalması səbəbindən sonradan şüşələr sındırılıb, binanın daxili hissələri dağıdılıb.
Bakı Şəhər Mədəniyyət Baş İdarəsindən bildirilib ki, paytaxtda və regionlarda əsaslı təmirə ehtiyacı olan mədəniyyət müəssisələrinin investisiya proqramlarına daxil edilməsi imkanları nəzərdən keçirilir. Hövsan Qəsəbə Mədəniyyət Evi ilə bağlı məsələyə də baxılır.
