İstirahət üçün təhlükəsiz məkan hesab edilən hovuzlar, suyun təmizlənməsi sistemindəki nasazlıqlar, kimyəvi maddələrin normasının aşılması və sanitariya qaydalarının pozulması səbəbindən ciddi sağlamlıq riski yarada bilər.
Oxu.Az-a istinadən, infeksionist, tibb elmləri namizədi Yekaterina Stepanova qeyd edir ki, kəskin qoxu, dəri və gözlərdə qıcıqlanma kimyəvi maddələrin konsentrasiyasının normadan artıq olduğunu göstərir.
Mütəxəssis belə hallarda dərhal duş qəbul etməyi, paltar dəyişməyi və tibbi yardıma müraciət etməyi tövsiyə edir.
Rusiyalı ekspert həmçinin xəbərdarlıq edir ki, hovuz ziyarətçiləri bakterial, virus və göbələk infeksiyalarına yoluxma riski altındadır. Bu infeksiyalar adətən su udulduqda və ya çirkli səthlərlə təmasda keçir.
Təhlükəsizlik filtrasiya və reaktiv dozalama sisteminin düzgün işləməsindən asılıdır. Sürüşməyə qarşı örtüklər vacibdir; yanlış quraşdırılmış dib axıdıcıları saç, ətraf və ya geyim hissələrini çəkə bilər.
Tövsiyələr:
- Papaq, eynək və başmaq istifadə edin.
- Başqalarının dəsmallarından istifadə etməyin.
- Dərinin səthlərlə lazımsız təmasından çəkinin.
- Hovuzdan sonra xlor qalıqlarını yumaq üçün duş qəbul edin.
