I Qarabağ müharibəsində itkin düşmüş Bahadur Kamalov Kəlbəcərin Zar kəndində dəfn olunub. Onun nəşinin qalıqları 44 günlük Vətən müharibəsindən sonra tapılıb.
Oxu.Az "Report"a istinadən xəbər verir ki, dəfn mərasimi rayonun Zar kəndində yerləşən yeni qəbiristanlıqda keçirilib.
Kəlbəcər rayonunun Zar kənd sakini Bahadur Məhəmməd oğlu Kamalov 19 yanvar 1937-ci ildə anadan olub. O, müxtəlif illərdə yerli idarəetmə orqanlarında çalışaraq Zar kənd sovetinin sədri vəzifəsini icra edib, kəndin ictimai-siyasi və sosial həyatında fəal iştirak edib.
Bahadur Kamalov 1993-cü il aprelin 5-də Ermənistan silahlı qüvvələrinin Kəlbəcər rayonunu işğal etməsi zamanı itkin düşüb. Uzun illər onun taleyi barədə dəqiq məlumat əldə olunmayıb və o, itkin düşmüş şəxslər siyahısında qeydiyyatda saxlanılıb. Aparılmış axtarış, identifikasiya və məhkəmə-tibbi ekspertiza tədbirləri nəticəsində Bahadur Kamalovun nəşinin qalıqları müəyyən edilib.
