Bakı Ağır Cinayətlər Məhkəməsində "İdrak" liseyində müəllimi güllələməkdə ittiham olunan 10-cu sinif şagirdinin cinayət işi üzrə hazırlıq iclası təxirə salınıb.
Məhkəmə təxirə salınmasına səbəb təqsirləndirilən yeniyetmənin vəkilinin prosesdə iştirak etməməsi olub.
Vəkil olmasa da, şagirdin valideynləri, o cümlədən anası Zemfira Şirinova məhkəmədə iştirak ediblər. Hakim Vüqar Quliyev yeniyetməyə və anasına hüquq və vəzifələrini izah edib.
Vəkil gəlmədiyindən növbəti iclas iyunun 17-nə təyin olunub.
Xatırladaq ki, hadisə fevral ayında "İdrak" liseyində baş verib. 10-cu sinif şagirdi Ə.Ş. atasının ov tüfəngi ilə liseyə gələrək 29 yaşlı riyaziyyat müəllimi Şəhla Kamilovanı güllələyib.
Şagird qəsdən adam öldürməyə cəhd maddəsi ilə ittiham olunur. Təqsiri sübut olunarsa, 18 yaşı tamam olmadığı üçün 10 ilədək həbs cəzası ala bilər.
