Bu gün Xalq yazıçısı İlyas Əfəndiyevin anadan olmasından 112 il ötür.
Oxu.Az xəbər verir ki, İlyas Məhəmməd oğlu Əfəndiyev 1914-cü il may ayının 26-da Qaryagində (indiki Füzuli rayonu) tanınmış tacir ailəsində anadan olub.
Əfəndiyevlər ailəsi sovet dövründə, 30-cu illərdə ciddi təqiblərə məruz qalıb. Ata-baba mülkü əlindən alınıb, ailənin bəzi üzvləri güllələnib, bəziləri sürgün olunub.
Yazıçı ilk hekayələrini Qaryagində coğrafiya müəllimi işləyərkən yazıb. O, 9 hekayəni dalbadal qələmə alıb.
1938-1939-cu illərdə "Yeni yol" qəzetində oçerk, resenziya və məqalələri dərc olunub. Daha sonra "Kommunist" və "Ədəbiyyat qəzeti"ndə çalışıb.
1940-cı ildə Azərbaycan Yazıçılar İttifaqına üzv qəbul edilib. 1949-cu ildə "Şərəf Nişanı" ordeni ilə təltif olunub.
1954-cü ildə "Atayevlər ailəsi" pyesi tamaşaya qoyulub və bu onun yaradıcılığında uğurlu addım olub.
1971-ci ildə "Qırmızı Əmək Bayrağı" ordeni, 1974-cü ildə isə "Oktyabr İnqilabı" ordeni ilə təltif edilib. 60 illik yubileyi münasibətilə dördcildlik seçilmiş əsərləri nəşr olunub.
Onun "Xurşidbanu Natəvan", "Şeyx Xiyabani" pyesləri, "Ceyran ovu", "Yasəmən ağacı" hekayələri, "Kənddən məktublar", "Aydınlıq gecələr" povestləri, "Xan çinar", "Sarıköynəklə Valehin nağılı" romanları oxucular tərəfindən sevilir.
1979-cu ildə "Xalq yazıçısı" fəxri adına layiq görülüb. 1984-1985-ci illərdə 6 cildlik seçilmiş əsərləri 40 min tirajla çap olunub.
80 illik yubileyi 1994-cü ildə təntənə ilə qeyd edilib və Prezident tərəfindən "Şöhrət" ordeni ilə təltif olunub.
Xalq yazıçısı 3 oktyabr 1996-cı ildə 82 yaşında dünyasını dəyişib.
