İsmayıllı rayonunun İvanovka kəndində 10 milyon manat dəyərində müasir süd emalı və pendir zavodu tikilir. Layihə Dağlıq Şirvan iqtisadi rayonunda aqrar sənayeyə təkan verməklə yanaşı, ölkənin süd məhsulları bazarında rəqabətqabiliyyətli istehsal zənciri formalaşdırmağı hədəfləyir. Məqsəd regionda südün yerində emalı, əlavə dəyər yaratmaq və xammal itkisinin qarşısını almaqdır.
Zavodda kərə yağı, kəsmik, qaymaq kimi ənənəvi məhsullarla yanaşı, sərt, yarı-sərt və milli pendir növləri, həmçinin Avropa tipli pendirlər istehsal olunacaq.
İqtisadçı Rauf Qarayev bildirib ki, təkcə zavod tikintisi sektorun problemlərini həll etmir; paralel olaraq fermaların yaradılması, damazlıq heyvan sayının artırılması, innovativ texnologiyaların tətbiqi və baytarlıq infrastrukturunun gücləndirilməsi vacibdir.
Ekspert Mircavid Həsənov vurğulayıb ki, emal sənayesi xammal satışından daha yüksək gəlir gətirir və fermerlərə sabit satış kanalı yaradır.
Liberal İqtisadçılar Mərkəzinin sədri Akif Nəsirli qeyd edib ki, xammal bazası gücləndirilmədən iri zavodların səmərəliliyi aşağı olar. O, südverən heyvanlara görə subsidiyaların tətbiqini tövsiyə edib.
