Azərbaycanda ödəniş kartlarının sayı artsa da, kredit kartlarına maraq zəifləyib. Mərkəzi Bankın statistikasına görə, vətəndaşlar borclanmaqdansa, mövcud vəsaitlərini xərcləməyə üstünlük verirlər.
Hazırda ölkədəki 22.4 milyon ödəniş kartının 20.3 milyonu debet, 2.1 milyonu kredit kartıdır. Son bir ildə debet kartların sayı 12% artıb, kredit kartlarının sayı isə 9% azalıb.
Bank eksperti Emin Kərimov deyir ki, azalmanın səbəbi limitlərin tətbiqidir: "Mərkəzi Bank tərəfindən kredit xətlərinə limitlər qoyulub. Əvvəl yüksək məbləğlər açılırdısa, indi bu, əməkhaqqının 4-5 misli səviyyəsinə endirilib."
Debet kartların artmasının səbəbi isə elektron ticarətin genişlənməsi və nağdsız ödənişlərə keçiddir. Ekspert deyir: "Debet kartlar daha geniş imkanlara malikdir və yaş məhdudiyyəti olmadan əlçatandır."
Kredit mütəxəssisi İsmayıl Məmmədov hesab edir ki, bu, maliyyə savadlılığının artmasının göstəricisidir: "İnsanlar 'borc iqtisadiyyatı'ndan çıxaraq 'vəsaitlərin ağıllı idarəedilməsi' modelinə keçir."
