Baş Dövlət Yol Polisi İdarəsi (BDYPİ) küləkli hava ilə bağlı sürücü və piyadalara müraciət edib.
Milli Hidrometeorologiya Xidmətinin məlumatına görə, bu gün Bakıda, Abşeron yarımadasında və bəzi bölgələrdə sarı və narıncı xəbərdarlıq verilib.
BDYPİ intensiv yağışlardan sonra əlverişsiz hava şəraitinin yollarda yarada biləcəyi problemlərin qarşısını almaq üçün ehtiyatlı olmağı və yol hərəkəti qaydalarına riayət etməyi xahiş edir.
Xüsusilə qoşqulu, tentli və uzun ölçülü yük avtomobillərinin sürücüləri daha məsuliyyətli olmalı, yüklərin qablaşdırılmasına diqqət yetirməlidir. Nəqliyyat vasitələrini sürüşmə və aşma təhlükəsi olan yerlərdən kənarda saxlamaq, park edərkən qapalı məkanlara üstünlük vermək tövsiyə olunur.
Piyadalar da hava şəraitini nəzərə almalı, təhlükəli davranışlardan çəkinməlidir.
