Kürdəmir rayonu Məhsəti Gəncəvi küçəsi, ev 12-də yaşayan Yaşar Əsgərovun evi bir neçə gündür uçub. 50 il əvvəl çiy kərpicdən tikilən ev dörd il öncə qəzalı vəziyyətə düşüb. Nəticədə dörd nəfər ailə üzvü evsiz qalıb.
Baku TV-nin qaynar xəttinə müraciət edən ailə dəfələrlə aidiyyəti qurumlara müraciət etsə də, əhəmiyyət verən olmayıb. Hazırda çətin durumda olan ailə kömək istəyir.
Zərərçəkən Şərəf Əsgərova bildirib: "Ev tamamilə qəzalı vəziyyətə düşəndən sonra kirayə qalmalı olduq. 200 manat pulu çətinliklə ödəyirəm. İki övladım var. Oğlumun biri Avropa çempionudur. Onu bu sınıq-sökük evdə əziyyətlə böyütmüşəm. Ev başımıza uçsaydı, necə olacaqdı?!"
Kürdəmir Rayon İcra Hakimiyyəti məlumatlı olduqlarını bildirib. Yaşar Əsgərova məxsus evə RİH və Fövqəladə Hallar Nazirliyinin Aran Regional Mərkəzinin əməkdaşları baxış keçirib.
Vətəndaşa çatdırılıb ki, icra hakimiyyətinin xərclər smetasında fərdi evlərin təmiri üçün vəsait nəzərdə tutulmadığından evin bərpası səlahiyyətləri xaricindədir. Bununla belə, Kürdəmir RİH evin uçması barədə FHN-ə rəsmi məktub ünvanlayıb. Məktub araşdırıldıqdan sonra ev sahibinə yekun məlumat veriləcək.
