Bakının Sabunçu rayonu, Maştağa qəsəbəsində bir yolun pis vəziyyəti sakinləri narahat edir.
Oxu.Az-ın qaynar xəttinə daxil olan şikayətdə bildirilir ki, "Ramana Gülçülük" ərazisində yol bərbad haldadır. Həm piyadalar, həm də nəqliyyat vasitələri çətinlik çəkir.
Xüsusilə 166 nömrəli marşrut avtobusunun sərnişinləri problem yaşayır. Minib-düşmək və rahat istifadə etmək mümkün deyil.
Azərbaycan Avtomobil Yolları Dövlət Agentliyinin sözçüsü Anar Nəcəfli bildirib ki, ərazi Dövlət İnvestisiya Proqramına daxil edildikdən sonra təmir olunacaq. Rayon icra hakimiyyəti müraciət edib, proqrama daxil olduqdan sonra işlər başlayacaq.
