İkinci Qarabağ müharibəsindən sonra Azərbaycanda "Böyük Qayıdış" proqramı çərçivəsində bir çox sahədə ciddi dəyişikliklər edilir. Bölgədə tamamilə yeni reallıqlar formalaşır.
Siyasi və Hüquqi Araşdırmalar Mərkəzinin rəhbəri Xəyal Bəşirov Oxu.Az-a açıqlamasında bildirib ki, işğaldan azad edilmiş ərazilərdə bərpa-quruculuq işləri və insanların doğma yurdlarına qaytarılması prioritet məsələlərdəndir.
Uzun müddət Ermənistanın işğalçılıq siyasəti nəticəsində bir milyona yaxın insan qaçqın və məcburi köçkün düşüb. O dövrün reallıqlarına uyğun olaraq qəbul edilmiş qanunlar indi aktuallığını itirib.
Xəyal Bəşirov qeyd edib ki, hazırda qanunvericilik sistemi yenilənir. Azərbaycan Mənzil Məcəlləsinə işğaldan azad edilmiş ərazilərdəki mənzil fondu ilə bağlı müddəalar daxil edilir. "Qaçqın" və "məcburi köçkün" ifadələrinin normativ aktlardan çıxarılması prosesi paralel aparılır.
Onminlərlə soydaşımız artıq dədə-baba yurdlarına qayıdıb. Minalar və işğal dövründəki dağıntılar səbəbindən qayıdış mərhələli şəkildə həyata keçirilir. Dövlət öz daxili imkanları hesabına prosesi sürətləndirir.
Siyasi şərhçi bildirib ki, qazanılan uğurlar qanunvericilikdə təsbit olunmalıdır. Torpaqlar azad olunub, ərazi bütövlüyü bərpa edilib, seçkilər keçirilir. Sülh prosesi davam edir. Belə şəraitdə "məcburi köçkün" ifadəsinin işlədilməsi reallıqla ziddiyyət təşkil edir. Dövlət bu ziddiyyəti aradan qaldırmaq üçün hüquqi addımlar atır.
