Abşeron rayonunun Məmmədli qəsəbəsində yolun pis vəziyyətdə olması səbəbindən sakinlər ictimai nəqliyyatdan istifadə edə bilmirlər.
Oxu.Az-ın qaynar xəttinə daxil olan şikayətdə bildirilir ki, 217 nömrəli marşrut avtobusu kəndin içinə daxil olmur.
“Gündəlik nəqliyyat imkanlarımız məhdudlaşıb. Avtobusun kənd ərazisinə daxil olmaması, xüsusilə yaşlıların, məktəblilərin və işə gedib-gələnlərin hərəkətində çətinlik yaradır”, - deyə şikayətdə bildirilir.
“BakuBus” MMC-nin mətbuat katibi Əsmər Əliyeva bildirib ki, Məmmədli qəsəbəsi yolundakı əlverişsiz hərəkət şəraiti nəzərə alınaraq, təhlükəsizlik məqsədilə 217 nömrəli marşrut xəttinin hərəkətində müvəqqəti dəyişiklik edilib.
Yenilənmiş sxemə əsasən, avtobuslar “Koroğlu” metrostansiyasından Kürdəxanı yolu ilə hərəkət edir, Pirşağı-Böyükşor yolundakı dairədən geriyə dönür, Pirşağı yolu ilə gəlib Məmmədli yoluna daxil olur. Əks istiqamətdə isə avtobuslar “Yanardağ” şadlıq sarayına qədər gedir, sonra geri dönərək Məmmədli yolundan Pirşağı yoluna çıxır və Kürdəxanı yolu ilə davam edir.
Yol təmiri “BakuBus”un səlahiyyətində olmadığından, aidiyyəti quruma müraciət etmək tövsiyə olunur.
