Mentor, motivasiya təlimçisi, "yaşam koçu" – son illər sosial şəbəkələrdə və gündəlik həyatda bu adlarla tez-tez qarşılaşırıq. Onlar insanlara liderlik, münaqişə həlli, şirkət təmsilçiliyi və üstün zəka vədləri verirlər. Keçmişdə sadəcə psixoloq və ya təlimçi kimi tanınan şəxslər indi fərqli adlarla geniş auditoriyaya müraciət edir.
Bəs bu maraq niyə artıb? İnsan resursları üzrə mütəxəssis Aytən Şıxəliyeva deyir ki, daxili boşluqların və dəstək ehtiyacının artması səbəb olur: "2023-cü ildən indiyə qədər mentorluq alma faizləri 15% artıb. Koçluq insanın potensialını aydınlaşdırmağa və həll yolu tapmağa kömək edir. Mentorlar bir sahənin mütəxəssisləridir, öz təcrübələrini bölüşürlər. Peşəkar motivatorlar insanı uzunmüddətli həvəsləndirməlidir."
O vurğulayır ki, bu sahədə peşəkar olmaq üçün beynəlxalq akkreditasiyalı məktəblərdə təhsil almaq lazımdır. Ancaq sosial şəbəkədə özünü "yaşam koçu" adlandıran çoxu təhsilsizdir və insanlara mənfi təsir göstərir.
Psixoloq Gülnar Orucova bildirir ki, müasir həyat stressli və rəqabətlidir, insanlar motivasiya axtarır. Bəziləri peşəkar təhsil alır, bəziləri isə pulsuz kurslarla bu sahəyə girir. "Access Bars" və "Teta Healing" kimi təlimlərin elmi əsası yoxdur.
