Moldovada yaşayan soydaşımız Ramiz Ansarov Orhey şəhərinin meri seçilib. Seçkinin ikinci turunda ilkin nəticələrə görə qalib gəlib.
Oxu.Az AZƏRTAC-a istinadən xəbər verir ki, bu barədə Ramiz Ansarov özü məlumat yayıb. Mayın 31-də keçirilən seçkinin ikinci turunda seçicilərin 58 faizindən çoxu onun lehinə səs verib.
Qeyd edək ki, mayın 17-də Orhey şəhəri meri seçkisinin birinci turunda Ramiz Ansarov ən çox səs toplayan namizəd olub.
1987-ci il aprelin 12-də Kişineuda anadan olan R.Ansarov əslən Qərbi Azərbaycandandır. Atası Barana (Noyemberyan) rayonunda doğulub böyüyüb. Ailəsi sonradan Bakıya köçüb. Dörd oğul atası olan R.Ansarov Moldovanın ictimai-siyasi həyatında fəaldır. O, həmçinin Moldova Azərbaycanlıları Konqresinin vitse-prezidenti kimi diasporun inkişafına töhfə verir.
