Bakının mərkəzi küçələrindən biri olan Sübhi Salayev küçəsinin bərbad vəziyyəti sakinlərin narazılığına səbəb olub.
Oxu.Az-a daxil olan məlumata görə, Nəsimi rayonunda yerləşən bu küçə Səməd Vurğun küçəsini Zivərbəy Əhmədbəyov küçəsi və Zabitlər Parkı ilə birləşdirir, lakin uzun müddətdir təmir edilmir.
"Yolun 300-500 metrlik hissəsində onlarla çala-çuxur var. Bu həm avtomobillərin hərəkətini çətinləşdirir, həm də nəqliyyat vasitələrinə ziyan vurur", - deyə şikayətdə bildirilib.
Azərbaycan Avtomobil Yolları Dövlət Agentliyi və Bakı Şəhər İcra Hakimiyyəti bildirib ki, bu küçələrin asfalt örtüyünün dəyişməsi onların səlahiyyətində deyil. Nəsimi Rayon İcra Hakimiyyətindən isə heç bir cavab alınmayıb.
