Bakıda bir sürücü, yol hərəkəti qaydalarını pozmadığı halda cərimələndiyini iddia edir.
Oxu.Az xəbər verir ki, sürücü sosial şəbəkələrdə paylaşım edib.
Hadisə paytaxtın Aşıq Molla Cümə küçəsində baş verib. Sürücü bildirib ki, avtomobilini saxladığı ərazidə parklanma xətləri olsa da, cərimə tətbiq olunub: "Avtomobilimi saxlayan zaman avtobus dayanacağını bildirən xətt görünmürdü. Sağ tərəfimdə digər maşınlar park edilmişdi. Avtomobili saxladığım nöqtədən avtobus dayanacağına qədər olan məsafə təxminən 30 metr təşkil edir".
Sürücü əlavə edib ki, xəttin bitməsindən bir metr sonra parklanma xətti çəkilib: "Bu vəziyyət ziddiyyət yaradır. Bir tərəfdən parklanma üçün yer ayrılıb, digər tərəfdən isə həmin ərazidə dayanmağa görə cərimə tətbiq olunur".
Baş Dövlət Yol Polisi İdarəsindən (BŞDYPİ) Oxu.Az-a verilən açıqlamada cərimənin qanuni olduğu bildirilib. Quruma görə, 1.17 nişanlanma xəttinə (ziqzaqvari sarı xətt) 15 metrdən az məsafədə dayanmaq qadağandır: "Görüntüdə vətəndaşın avtomobilini park etdiyi yer qanuni parklanma ərazisi deyil".
Parklanmanın qadağan olduğu ərazidə çaşdırıcı xətlərin olması ilə bağlı Azərbaycan Yerüstü Nəqliyyat Agentliyinə (AYNA) sorğu ünvanlanıb.
