Prezident İlham Əliyevin rəhbərliyi ilə keçirilən müşavirədə səsləndirilən fikirlər təkcə kənd təsərrüfatına deyil, ümumilikdə milli təhlükəsizlik məsələsinə strateji mesajdır.
Bu fikirləri Oxu.Az-a açıqlamasında Kənd Təsərrüfatı Nazirliyi yanında fəaliyyət göstərən İctimai Şuranın sədri Mürvət Həsənli deyib.
O bildirib ki, bu gün dünyada baş verən geosiyasi proseslər göstərdi ki, ərzaq təhlükəsizliyi neft, qaz və hərbi təhlükəsizlik qədər vacibdir:
"Müharibələr, logistika zəncirlərinin qırılması, enerji və gübrə qiymətlərinin artması bir çox ölkələrdə ərzaq böhranı yaratdı. Azərbaycan isə vaxtında atılmış addımlar sayəsində bu riskləri müəyyən qədər idarə edə bildi. Dövlət başçısının fikirlərini tapşırıq kimi qəbul ediriksə, ilk növbədə yerli istehsalın daha da gücləndirilməsi əsas prioritet olmalıdır. Xüsusilə, quşçuluq, heyvandarlıq, taxılçılıq, yem istehsalı və damazlıq bazasının genişləndirilməsi strateji istiqamətlərdir. İdxaldan asılılığın minimuma endirilməsi üçün daxili istehsal zəncirinin tam formalaşdırılması vacibdir. Burada yalnız məhsul istehsalı deyil, yem, vaksin, inkubasiya, logistika və emal infrastrukturu da nəzərdə tutulmalıdır. Eyni zamanda innovativ texnologiyaların tətbiqi sürətləndirilməlidir. Suya qənaət edən ağıllı suvarma sistemləri, rəqəmsal kənd təsərrüfatı, süni intellekt əsaslı idarəetmə, yüksək məhsuldar cinslər və müasir baytarlıq xidmətləri artıq seçim deyil, zərurətdir. Dünyada rəqabətqabiliyyətli olmaq üçün məhsulun maya dəyərini azaltmaq və keyfiyyətini yüksəltmək əsas məsələdir. Azərbaycanın bu istiqamətdə əldə etdiyi mühüm uğurlar var".
M.Həsənli qeyd edib ki, son illərdə quş əti və yumurta istehsalında özünütəminetmə səviyyəsinin yüksəlməsi, müasir aqroparkların yaradılması, dövlət subsidiyaları, fermerlərə verilən dəstək, kənd təsərrüfatında texnika parkının yenilənməsi və ixrac potensialının artması ciddi nəticələrdir:
"Xüsusilə, pandemiya və regional böhranlar dövründə ölkədə ərzaq qıtlığının yaranmaması həyata keçirilən siyasətin uğurunu göstərdi. Bununla yanaşı, qarşımızda ciddi çağırışlar da dayanır. İqlim dəyişiklikləri və su qıtlığı artıq region üçün əsas risklərdən biridir. Yem xammalının bir hissəsinin idxaldan asılı olması maya dəyərinə təsir edir. Dünyada enerji və logistika qiymətlərinin dəyişməsi daxili bazara da təsirsiz ötüşmür. Digər mühüm məsələ isə kənd təsərrüfatında peşəkar kadr hazırlığıdır. Müasir texnologiyanı idarə edə bilən aqronom, baytar və mühəndis resurslarının gücləndirilməsi vacibdir. Bu gün əsas məqsəd yalnız bazarı təmin etmək deyil, dayanıqlı və rəqabətqabiliyyətli ərzaq sistemi qurmaqdır. Prezident İlham Əliyevin müşavirədə verdiyi mesajlar göstərir ki, Azərbaycan bundan sonra da kənd təsərrüfatını strateji sektor kimi inkişaf etdirməyə davam edəcək və ərzaq təhlükəsizliyi dövlət siyasətinin əsas prioritetlərindən biri olaraq qalacaq".
