Yaxın zamanlarda azad olunmuş ərazilərdə Qan Bankının regional bölmələrinin yaradılması planlaşdırılır.
Səhiyyə Nazirliyinin Səhiyyə siyasəti şöbəsinin müdiri Ramiq Quliyev Ümumdünya Qan Donoru Gününə həsr olunan tədbirdə bildirib ki, hazırda ölkə üzrə Qan Bankının 8 regional bölməsi fəaliyyət göstərir. Yaxın vaxtlarda azad edilmiş iki iqtisadi rayonda da regional bölmənin açılması nəzərdə tutulur.
R.Quliyev qeyd edib ki, 2024-cü ilin iyul ayında qəbul edilmiş qərara əsasən, bu sahənin inkişafı və qan xidmətinin təkmilləşdirilməsi üçün mühüm addımlar atılıb. Qanunvericilik bazasının möhkəmləndirilməsi, könüllü və təmənnasız donorluğun təşviqi əsas prioritetlərdəndir.
Dünya Qan Donoru Gününün qeyd olunmasının məqsədi insanları könüllü qanverməyə təşviq etmək və donorların cəmiyyət üçün əhəmiyyətini vurğulamaqdır. Bir donorun verdiyi qan bir, bəzən isə bir neçə insanın həyatını xilas edir.
