Prezidentin köməkçisi - Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov Rəqəmsal İnkişaf Şurasının ilk iclasında çıxış edib.
O, xarici təcrübənin öyrənildiyini, lakin bütün qərarların Azərbaycanın milli maraqlarına uyğun qəbul ediləcəyini vurğulayıb.
Şahmar Mövsümov bildirib ki, Prezident İlham Əliyevin rəhbərliyi ilə rəqəmsal transformasiya dövlət siyasətinin əsas prioritetlərindən biridir. Prezidentin Fərmanı ilə yaradılan Rəqəmsal İnkişaf Şurası və 2026-2028-ci illər üçün Fəaliyyət Planı təsdiq edilib.
Birinci vitse-prezident Mehriban Əliyevanın rəhbərliyi ilə Şurada müasir qanunvericilik bazasının formalaşdırılması istiqamətində kompleks islahatlar hazırlanır.
Prezidentin köməkçisi qeyd edib ki, bu, postsovet məkanında rəqəmsal ekosistemin inkişafı üçün ən əhatəli islahat təşəbbüsüdür.
İslahatların əhatə etdiyi sahələr: hüquqi müəyyənlik, rəqabətqabiliyyətli vergi mühiti, innovasiyaların maliyyələşdirilməsi, elmi-tədqiqat və innovasiya təşviqləri, istedadların cəlbi, bazara çıxış imkanları, kibertəhlükəsizlik.
