Hüquq-mühafizə orqanlarına bilə-bilə yalan məlumat verməklə bir şəxsi cinayətdə ittiham etmək qanuni məsuliyyətə səbəb olur. Bu, Ali Məhkəmədən e-huquq.az-a bildirilib.
Azərbaycan Cinayət Məcəlləsi bilə-bilə yalan məlumat verməyə görə məsuliyyət müəyyən edir. Belə hallarda əsassız ittiham olunan şəxsin şərəf, ləyaqət və işgüzar nüfuzu zərər görə bilər və mənəvi zərərin ödənilməsi tələb oluna bilər.
Lakin vicdanlı niyyətlə edilən müraciətlər məsuliyyət yaratmır. Məsələn, real şübhələrə əsaslanan oğurluq şikayəti sonradan təsdiq olunmasa belə, qanuni sayılır.
Müraciətlər səlahiyyətli orqanlara ünvanlanmalıdır. Əks halda, şikayət olunan şəxsin nüfuzuna xələl gələ bilər. Həmçinin, vəzifəli şəxslərə qarşı şikayətlərdə şəxsi həyata aid aidiyyətsiz məlumatlar daxil edilməməlidir.
Ali Məhkəmə Plenumunun yeni qərarı şərəf, ləyaqət, işgüzar nüfuz və şəxsi toxunulmazlıq hüquqlarını ayırır. Qərara görə, hər kəsin pozulmuş hüquqlarını bərpa etmək üçün səlahiyyətli orqana ittiham xarakterli müraciət etmək hüququ var, lakin bu müraciətlər təhqiredici, yalan məlumatlı və ya hüquqdan sui-istifadə xarakteri daşımamalıdır.
