Baku TV-yə müraciət edən Günel İsmayılova 2022-ci ildə həyat yoldaşından ayrıldığını deyir. Ayrılıqdan sonra bir müddət eyni evdə yaşasa da, sonradan evdən çıxarılıb.
İsmayılova bildirir ki, evin heç bir rəsmi sənədi olmayıb və mülk keçmiş qayınatasının anasının adına qeydiyyatda olub. Onun sözlərinə görə, yaşama hüququnu məhdudlaşdırmaq üçün qəsdən vərəsəlik işi açılıb və ev keçmiş baldızının adına keçirilib.
Sabunçu Rayon Məhkəməsi onun yaşama hüququnu tanımayıb. Bakı Apellyasiya Məhkəməsi də bu qərarı qüvvədə saxlayıb. İsmayılova işdə olarkən icra məmurlarından zəng gələrək evdən çıxarılacağını öyrənib.
Keçmiş baldız isə iddiaları rədd edir. O, prosesin üç il davam etdiyini və qanuni şəkildə həll olunduğunu vurğulayır. Ali Məhkəmə də yaşama hüququ tələbini rədd edib.
Hüquqşünas Hikmət Əliyev bildirir ki, qanuni qüvvəyə minmiş məhkəmə qərarları məcburidir. Eyni məsələ ilə bağlı yenidən müraciət etmək mümkün deyil.
