Şabranda sel sularının avtomobil yollarında yaratdığı fəsadlar aradan qaldırılır. Azərbaycan Avtomobil Yolları Dövlət Agentliyi (AAYDA) məlumat yayıb.
Bərpa işləri Düzbilici-Oxu Vələsi-Çinarlar yolunun 5 və 8-ci km-də, həmçinin Şabran-Qalaaltı yolunun 6-cı km-də aparılır. Ərazilərdə qazıntı və əks-dolğu işləri görülür, suötürücü borular bərpa edilir.
Yaranmış problemlərin aradan qaldırılması üçün təxirəsalınmaz tədbirlər həyata keçirilir. Məqsəd nəqliyyat əlaqəsinin qısa müddətdə tam bərpası və hərəkətin təhlükəsiz şəkildə təşkilidir.
Sel sularının yarada biləcəyi təhlükələrin qarşısını almaq üçün qabaqlayıcı addımlar atılır. Bərpa işləri Azərbaycan Respublikası Prezidentinin sərəncamına uyğun olaraq davam etdirilir.
