"Şəhərin harada bitdiyini və kəndin harada başladığını ayırd etmək çox çətindir".
Bunu İsveçrədə İnteqrasiya olunmuş Şəhər Həlləri üzrə Direktor Haris Piplas WUF13 çərçivəsində Azərbaycan pavilyonunda keçirilən "Şəhər transformasiyası praktikada: Təhlükəsiz və dayanıqlı icmalar üçün şəhər təcrübələri" adlı tədbirdə deyib.
O bildirib ki, urbanizasiya olunmuş aqlomerasiyalarda yaşayırıq və bu vəziyyət daim dəyişir:
"Avropanın əhalisinin böyük hissəsi də məhz belə ərazilərdə yaşayır. COVID böhranının bu prosesə necə təsir etdiyini izah edən kitabları oxusanız, görərsiniz ki, iş və gündəlik həyat daha da mərkəzdən uzaqlaşıb, yəni desentralizasiya olunub. Bu da şəhər ilə kənd arasındakı sərhədi daha da qeyri-müəyyən edib. Artıq işin, istirahətin və sosial həyatın harada baş verdiyini dəqiq müəyyənləşdirmək çətinləşib".
H.Piplas vurğulayıb ki, İsveçrədə hazırda şəhər və kənd arasında siyasi qarşıdurma mövcuddur:
"Şəhərdə yaşayan insanlar daha çox liberal, yaşıl-sol baxışlara meyillidirlər, kənd əhalisi isə fərqli mövqedə dayanır. Beləliklə, Avropada şəhər-kənd bölgüsü siyasi baxımdan digər bölgələrdəki vəziyyətə bənzəyir.
Amma əslində Avropada yaşayan bir çox insan hibrid şəhər-kənd reallığında yaşayır".
