"Son zəng"ə sayılı günlər qalır. Hər il olduğu kimi, məzunlar son dəfə məktəb həyətində toplaşmağa hazırlaşır. Ancaq bu tədbir artıq təkcə duyğusal deyil, həm də xərc baxımından ən çox müzakirə olunanlardandır.
Bir zamanlar qara şalvar, ağ köynək kifayət edirdisə, indi siyahı uzundur: xüsusi geyim, foto-video çəkiliş, rəqslər, məzun albomu, restoran gecəsi. Valideynlər üçün bu, əlavə məsrəf deməkdir.
Bəs bir şagird üçün ortalama xərc nə qədərdir? Aylar öncə başlayan hazırlıqda ən böyük xərc geyimə düşür. Qızlar üçün paltar, ayaqqabı, saç və makiyaj, oğlanlar üçün kostyum, köynək və ayaqqabı minimum 130-150 manat arasıdır.
Restoran və ya tədbir məkanlarında məzun gecəsi adambaşına 80 manatdan başlayır. Foto və video çəkiliş, məzun albomu isə 45-120 manat arası dəyişir. Bütün bunlar toplananda orta xərc 350-450 manat olur.
Rəqs müəllimi İftixar Rəsulov deyir ki, bu il məzunlar milli rəqslərə maraq göstərir. Hər sinfə iki rəqs nömrəsi hazırlanır: klassik vals və milli/müasir üslub. Hazırlıq iki ay əvvəl başlayır, həftədə bir neçə məşq olur. Qiymət adambaşına 25-50 manat arasıdır.
Təhsil eksperti Ramin Nurəliyev dəbdəbəli tədbirlərin məqsədəuyğun olmadığını deyir: "Sadə və səmimi tədbirlər daha yaxşıdır. Son zəng mühüm xatirədir, lakin həddən artıq xərc çəkmək lazım deyil."
Sosioloq Mail Yaqub isə valideyn məsuliyyətini vurğulayır: "Valideynlər övladlarına izah etməlidir ki, israfçılıq mənasızdır. Məktəblər arasında yarış yanlışdır."
