Milli Məclisin deputatı Mehriban Vəliyeva Oxu.Az-a açıqlamasında uşaqların sosial şəbəkələrin zərərli təsirlərindən qorunmasına yönələn qanunvericilik təşəbbüsünü müasir dövrün çağırışlarına uyğun strateji addım kimi qiymətləndirib.
Deputat bildirib ki, son illər dünyada uşaqların sosial mediadan istifadəsinə yaş məhdudiyyətlərinin tətbiqi tendensiyası güclənir. Avropa İttifaqı, ABŞ, Avstraliya və digər dövlətlərdə uşaqların məlumatlarının qorunması və kibertəhlükəsizlik üçün müxtəlif yaş məhdudiyyətləri tətbiq olunur.
Vəliyeva vurğulayıb ki, 16 yaşadək uşaqların sosial şəbəkələrdə qeydiyyatının məhdudlaşdırılması onların təhsil, mütaliə, idman və yaradıcılığa yönəlməsinə şərait yaradacaq. Bu, sağlam düşüncə, emosional sabitlik və intellektual inkişafa müsbət təsir göstərəcək.
Deputat əlavə edib ki, qanun dəyişikliyi valideyn məsuliyyətini və nəzarət imkanlarını gücləndirəcək. Yeni tənzimləmə valideynlərə övladlarının rəqəmsal fəaliyyətini izləməyə və təhlükəli məzmunlardan qorumaya imkan verəcək.
Nəhayət, parlamentari qeyd edib ki, qəbul edilən dəyişikliklər Azərbaycanda daha təhlükəsiz rəqəmsal mühit formalaşdırmaqla yanaşı, uşaqların hüquqlarının qorunmasına və sağlam nəslin yetişməsinə töhfə verəcək.
