Türk Dövlətləri Təşkilatı (TDT) çərçivəsində Müsəlman Dini İdarələri Rəhbərlərinin Şurası uğurla fəaliyyət göstərir. Bu gün Şuşada əsası qoyulan yeni platforma strateji zərurətdən doğur.
Dini Qurumlarla İş üzrə Dövlət Komitəsinin sədri Ramin Məmmədov bildirib ki, platforma dövlətlərarası hüquqi və institusional təhlükəsizlik arxitekturasını quracaq. O, bunu böyük türk ailəsinin mənəvi bütövlüyünə xidmət edən tarixi missiya adlandırıb.
R. Məmmədov vurğulayıb ki, Azərbaycan İlahiyyat İnstitutunun potensialından istifadə olunacaq. TDT üzv ölkələrin dini təhsil müəssisələri arasında təcrübə mübadiləsi və akademik əməkdaşlıq qurulacaq.
Platforma çərçivəsində işğaldan azad edilən ərazilərdə dini-mədəni irsin qorunması və bərpası, vandalizm aktlarının ifşası strategiyası müəyyənləşdirilib. İlk dəfə dövlət səviyyəsində mərkəzləşdirilmiş informasiya mübadiləsi aparılacaq.
R. Məmmədov əmin olduğunu bildirib ki, bu platforma gələcəkdə ən güclü mənəvi və hüquqi sütunlardan biri olacaq.
