Baku TV-nin "Gör nələri qaytarmışıq" verilişinin yeni buraxılışı mədəniyyətimizin beşiyi Şuşaya həsr olunub.
XVIII əsrdə Pənahəli xan tərəfindən qayalar üzərində salınan Şuşa əvvəlcə qala, sonra xanlığın paytaxtı olub. Küçələrində musiqi nəfəs alan bu şəhər "Qafqazın konservatoriyası" adını qazanmışdı.
1992-ci il mayın 8-də Şuşa işğal edildi. Azərbaycan ağır siyasi böhran və orduda komandanlıq çatışmazlığı yaşayırdı. Şuşanın işğalı tariximizin ən böyük yaralarından biri oldu.
2020-ci il sentyabrın 27-də başlayan 44 günlük Vətən müharibəsində Şuşa azad edildi. Əsgərlərimiz sıldırım qayaları aşaraq düşmənlə əlbəyaxa döyüşdü.
8 noyabr 2020-ci ildə Şuşanın azadlığı Azərbaycana son 100 ilin ən böyük müjdəsini gətirdi. Bu, təkcə bir şəhərin qurtuluşu deyil, milli qürurumuzun qayıdışı idi.
Bu gün Şuşada həm binalar, həm də şəhərin ruhu bərpa olunur. Şuşa 2021-ci ildə Azərbaycanın, 2023-cü ildə isə türk dünyasının mədəniyyət paytaxtı seçilib.
