Baku TV-nin "O vaxtlar" verilişinə qonaq olan Şuşa sakini Təranə Tağıyeva uşaqlıq xatirələrini, Şuşa həsrətini və ailə dəyərlərini bölüşüb.
O, həmçinin Tehrandakı səfirliyə hücum zamanı qəhrəmanlıq göstərən oğlu Vasif Tağıyevdən danışıb.
Şuşada qızların tərbiyəsinə və milli adətlərə xüsusi önəm verildiyini deyən Təranə xanım elçilərin evlərinə iki-üç dəfə gəldiyini, atasının əvvəlcə razılıq vermədiyini, sonda isə israra tab gətirdiyini bildirib.
İşğal dövrünü xatırlayan ana: "Təzə evlənmişdik, hər şeyimiz təzə idi. Bombalardan qorxaraq günlərlə zirzəmidə qaldıq. Şuşanı tərk edəndə bütün var-dövlətimiz orada qaldı."
Oğlunun qəhrəmanlığı haqda: "Hadisə günü səhər danışmışdıq. Xəbər yayılanda dəfələrlə zəng etdim, cavab vermədi. Görüntülü danışdıq, yaralı idi. Düşünürəm ki, oğlum orada olmasaydı, çox adam həlak olardı."
