Bakının Səbail rayonunda yerləşən XIX əsr tarixi abidənin damı qəzalı vəziyyətdədir. Sakinlər hər güclü yağışda mənzillərinə su axdığını bildirir.
Üzeyir Hacıbəyov küçəsi 18 ünvanındakı binada yaşayan bir sakin Oxu.Az-a müraciət edib. O, dam örtüyünün uzun müddətdir təmir edilmədiyini deyib.
Sakin qeyd edib ki, mənzil sonuncu mərtəbədə yerləşir. Yağış zamanı vedrə və ləyənlərlə su yığmaq məcburiyyətində qalırlar.
Həmin sakinin anası ağır xəstədir və kimyaterapiya müalicəsi alır. Yağışda su ilə mübarizə aparmaq onun üçün çətinlik yaradır.
Binanın girişində tavan örtüyü çöküb. Hər an yeni uçqun ola bilər. Bu, sakinlərin həyatı üçün real təhlükədir.
Bina dövlət qeydiyyatındadır və mədəni irs abidəsidir. Təmir edilməməsi tarixi irsə də ziyan vurur.
Sakinlər Mənzil-Kommunal İstismar Sahəsinə, İcra Hakimiyyətinə, Fövqəladə Hallar Nazirliyinə və Mədəni İrs Xidmətinə müraciət etsə də, problem həll olunmayıb.
Səbail Rayon İcra Hakimiyyətindən bildirilib ki, bina təmir siyahısına salınıb və nəzarətə götürülüb.
