Nizami Tibb Mərkəzinə və Respublika Dəri-Zöhrəvi Mərkəzinə direktor müavinləri təyin edilib.
TƏBİB-in məlumatına görə, Nizami Tibb Mərkəzinə direktor müavini, doğum evinin rəhbəri vəzifəsinə professor Fərəh Qaraqurbanlı təyin olunub.
Fərəh Qaraqurbanlı 1997-ci ildə tibb elmləri namizədi, 2004-cü ildə isə tibb elmləri doktoru alimlik dərəcəsi alıb. 2024-cü ildə ona professor elmi adı verilib.
O, 1991-1999-cu illərdə həkim-mama-ginekoloq, 1999-2008-ci illərdə müxtəlif doğum evlərində şöbə müdiri və baş həkim vəzifələrində çalışıb.
2008-ci ildən hazırkı təyinatına qədər Səhiyyə Nazirliyinin İctimai Səhiyyə və İslahatlar Mərkəzində və Baku Medical Plaza-da həkim-mama-ginekoloq kimi fəaliyyət göstərib.
Respublika Dəri-Zöhrəvi Mərkəzinə direktor müavini, baş həkim vəzifəsinə tibb üzrə fəlsəfə doktoru Rəxşəndə Əhmədova təyin edilib.
Rəxşəndə Əhmədova 1994-cü ildə Azərbaycan Tibb Universitetini bitirib, 2016-cı ildə tibb üzrə fəlsəfə doktoru elmi dərəcəsini alıb.
O, 1997-1999-cu illərdə həkim, 1999-2020-ci illərdə Serologiya şöbəsinin müdiri, 2020-ci ildən isə Laboratoriya şöbəsinin müdiri vəzifələrində çalışıb.
