İran Polisi, Azərbaycanın Təbrizdəki Baş Konsulluğunun konsulu Ramil İmranovun həlak olduğu avtomobil qəzasının təfərrüatlarını açıqlayıb.
Hadisə şənbə günü Mərənd yaxınlığında baş verib. Diplomatik nömrəli "KIA Sportage" beton daşıyan mikserlə toqquşub.
Polis rəisi Əhməd Kərimi Əsəd bildirib ki, qəzada yalnız Ramil İmranov olub və o, hadisə yerində həyatını itirib. İlkin araşdırmalara görə, sürücü diqqətsizlik edib və əyləc izləri tapılmayıb.
Qəzanın səbəbi kimi "sürücünün yola kifayət qədər diqqət yetirməməsi" göstərilib. Həmçinin sürücünün sağlamlıq problemi yaşaması ehtimalı da araşdırılır.
