Ağdaşda yük avtomobilini ildırım vurub, nəqliyyat vasitəsi bir neçə dəqiqəyə yanıb.
Hadisə Ağdaş rayonunun Ləki kəndində baş verib. Nurlan Allahverdiyevin idarə etdiyi TIR-a ildırım düşməsi nəticəsində avtomobil alovlanıb.
Bu hadisə ildırımlı havada avtomobil təhlükəsizliyi məsələsini yenidən gündəmə gətirib. Mütəxəssislər bildirir ki, metal konstruksiya avtomobilləri ildırıma qarşı daha həssas edir.
Xüsusilə elektromobillərin və hibridlərin sayı artdıqca bu məsələ aktuallaşır. Avtomobil ustası Sahil Ağabəyli qeyd edib ki, yüksəkgərginlikli batareyalar qorunsa da, ildırım vurması texniki nasazlıq və yanğın riskini tam aradan qaldırmır.
O, təhlükəli maye daşıyan sürücüləri daha diqqətli olmağa çağırıb. Mütəxəssislər tövsiyə edir: ildırımlı havada təhlükəsiz yerdə dayanın, pəncərələri bağlayın və metal hissələrə toxunmayın.
