Bakıda keçirilən Ümumdünya Şəhərsalma Forumunda (WUF13) Ukrayna stendi yüksək qiymətləndirilir. Ukraynanın İcmalar və Ərazilərin İnkişafı Nazirliyini təmsil edən Yuliya Çileneva Oxu.Az-a açıqlamasında bildirib ki, Azərbaycanın yaratdığı şərait əməkdaşlıq üçün əladır.
O, dəvətə görə təşəkkür edərək qeyd edib: “Bu platforma vasitəsilə müharibənin vurduğu ziyanı dünyaya çatdırırıq.”
Azərbaycanın dəstəyindən danışan Çileneva deyib: “Ən çətin dövrlərdə, xüsusilə istilik məntəqələrinin təşkilində yardım etdilər. Bu, bizim üçün həyati idi.”
Yenidənqurma proseslərindən bəhs edən nazirlik rəsmisi qlobal təcrübə mübadiləsinin rolunu vurğulayıb. O, Qarabağın bərpası təcrübəsini Ukrayna üçün yararlı model adlandırıb.
“Ağıllı şəhər” layihələrinin əhəmiyyətinə toxunan Çileneva bildirib: “Rəqəmsallaşma həyat səviyyəsini yüksəldir. Şəhərlər daha müasir bərpa edilməlidir.”
