BMT-nin Məskunlaşma Proqramı (UN-Habitat) şəhərsalma ilə bağlı tövsiyələrini 6 tematik sahə üzrə qruplaşdırıb.
Oxu.Az "Report"a istinadən xəbər verir ki, bunu UN-Habitat-ın Torpaq, Mənzil və Sığınacaq Bölməsinin rəhbəri Ombretta Tempra Ümumdünya Şəhərsalma Forumunun 13-cü sessiyasında bildirib.
Onun sözlərinə görə, bu tövsiyələr ekoloji davamlılıq üçün əsas hərəkətverici amilləri əhatə edir: hüquqlara əsaslanan yanaşmanın inteqrasiyası, institusional potensialın artırılması, maliyyə mənbələrinin səfərbər edilməsi, bilik ekosistemlərinin gücləndirilməsi, sosial maarifləndirmə və davranış transformasiyası, habelə inteqrasiya olunmuş regional inkişaf strategiyaları.
Tempra vurğulayıb ki, maliyyələşmədəki boşluqlar ən çox mənzil dayanıqlığı kontekstində özünü göstərir. Təşviq edilən həllər çox vaxt Qərb bazarına yönəlib və bütün regional kontekstlərə uyğun gəlmir. Polisentrik böyümə, regionlar arası bərabərsizliklərin azaldılması və şəhər-kənd əlaqələrinin gücləndirilməsi əsas hədəflərdir.
