"AZCON Holding" qrupuna daxil olan "Azərbaycan Dəmir Yolları" (ADY) QSC və "AzInTelecom" MMC-nin birgə layihəsi nəticəsində ölkəmizdə ilk dəfə dəmir yollarında üztanıma ilə ödəniş tətbiq edilib.
ADY-nin məlumatına görə, yeni "SİMA Pay" sistemi 15 may 2026-cı il tarixindən etibarən istifadəyə verilib.
İlk mərhələdə xidmət Bakı Dəmiryol Vağzalı, Sumqayıt Dəmiryol Vağzalı və "Koroğlu" dayanacağındakı turniketlərdə mövcuddur. Gələcəkdə Abşeron dairəvi marşrutu və bütün ölkə üzrə dəmir yolu şəbəkəsində tətbiq planlaşdırılır.
Sərnişinlər "ADY Mobile" tətbiqində "Üztanıma ilə keçin" bölməsindən istifadə edərək fiziki karta ehtiyac olmadan turniketdən keçə bilərlər.
Bu yenilik təhlükəsizliyi artırır, itki və balans problemi kimi narahatlıqları aradan qaldırır.
