Əmək və Əhalinin Sosial Müdafiəsi Nazirliyinin tabeliyindəki qurumlarda vakant vəzifələr üçün keçirilən imtahan mərhələsindən 70 faiz nəticə göstərənlər müsahibəyə buraxılacaq.
Bu barədə Əmək Bazarı və Sosial Müdafiə Məsələləri üzrə Milli Observatoriyanın mətbuat katibi Fidan Seyidşahqızı jurnalistlərə açıqlamasında bildirib.
O qeyd edib ki, imtahan 100 dəqiqə davam edib. Sualların ən azı 70 faizini düzgün cavablandıran namizədlər uğurlu sayılaraq ikinci mərhələyə – müsahibəyə buraxılırlar.
Müsahibə mərhələsində namizədlərin bilik səviyyəsi, peşəkar bacarıqları və vəzifəyə uyğunluğu qiymətləndirilir.
Bəzi namizədlər isə imtahan mərhələsindən azad olunurlar. Bunlara elmlər doktoru elmi dərəcəsi olanlar, azı 5 il dövlət qulluğu stajı olan dövlət qulluqçuları, peşəkar mühasib və tibbi sertifikata sahib şəxslər, yuxarı müsabiqənin finalçıları, həmçinin "Gənc Dost" könüllü proqramını A sertifikatı ilə başa vuran könüllülər daxildir.
Lakin bu imtiyazdan yararlanmaq üçün həmin şəxslər sənəd qəbulu zamanı imtiyazlarını təsdiq edən sənədləri sistemə yükləməlidirlər.
