WUF13-ə hazırlıq dövründə və forum zamanı yerüstü nəqliyyatın iş prinsipi açıqlanıb.
Azərbaycan Yerüstü Nəqliyyat Agentliyi (AYNA) bildirib ki, ictimai nəqliyyatda hərəkət aşağıdakı kimi təşkil ediləcək:
Avtobuslarla daşınma: WUF13 çərçivəsində doqquz hab və iki son məntəqə, həmçinin 67-dən çox aralıq məntəqə yaradılıb. Hava limanından məntəqələrə 6, tədbir günlərində isə həmin məntəqələrdən forum ərazisinə 12 marşrut fəaliyyət göstərəcək. Daşımalar əsasən elektrikli avtobuslarla həyata keçiriləcək. Bütün xətlər AYNA-nın monitorinq mərkəzi tərəfindən 24/7 izləniləcək. Prosesə 1500-ə yaxın işçi cəlb edilib.
“Ayna MaaS” tətbiqi ilə həm tədbir, həm də ictimai nəqliyyat marşrutlarında gediş planlaşdırmaq mümkündür. Xarici bank kartları ilə ödəniş imkanı yaradılıb.
İnfrastruktur: 6 küçə və prospektdə 41.5 km xüsusi hərəkət zolağı çəkilib, 34 küçədə (170 km) üfüqi nişanlama bərpa edilib.
Mikromobillik: 63.2 km mikromobillik zolaqları yaradılıb, skuter parkı yenilənib, xarici nömrələrlə qeydiyyat mümkündür.
Taksi fəaliyyəti: 150 “Bakı taksi” və hava limanında 330 taksi cəlb edilib, sürücülər təlim keçib. Taksilər stadion zonası və “Koroğlu” NMM-də istifadə edilə bilər. Hava limanında minib-düşmə yerləri Terminal 2 qarşısında müəyyənləşib.
