Media nümayəndələri Bakı Olimpiya Stadionunda (BOS) WUF13-ə hazırlıqları yerində izləyiblər.
Akkreditasiya mərkəzində jogjurnalistlərə məlumat verilib ki, tədbir məkanı 53 hektar ərazini əhatə edir. Bunun 43 hektarı əsas tədbir sahəsi, 10 hektarı isə nəqliyyat terminalı və parklanma zonasıdır.
Stadion zonalara bölünüb: A Zonasında 5 küçə var, hər biri Azərbaycan şəhərlərinin adını daşıyır. Yüksəksəviyyəli qonaqlar üçün xüsusi qəbul və istirahət zonaları ayrılıb.
Açılış və bağlanış mərasimləri 6000 nəfərlik salonda keçiriləcək. Əsas müzakirə zonası 3.55 hektardır və paralel sessiyalar, BMT tədbirləri, ikitərəfli görüşlər üçün nəzərdə tutulub.
Forumda gündə 300-ə qədər paralel tədbir planlaşdırılır. Tərcümə xidməti BMT-nin 6 rəsmi dili, həmçinin Azərbaycan və türk dillərində təmin olunacaq. Əlillər üçün beynəlxalq işarə dili xidməti də mövcuddur.
35-dən çox iaşə məntəqəsi fəaliyyət göstərəcək və qiymətlər nəzarətdə saxlanılacaq. Media mərkəzi 600 nəfərlik tutuma malikdir və canlı yayım, müsahibə otaqları, TV studiyaları ilə təchiz olunub.
Fasiləsiz internet və yayım üçün əsas və ehtiyat məlumat mərkəzləri qurulub. Sonda jurnalistlər maraqlandıran suallara cavab alıblar.
